طراطيش كلام ,الجزء الثانى

((2))

حق ايه اللى انتا جاي تقول عليه ..!!

كتر الايام دى الكلام عن الحقوق وكل واحد بأه عامل فيها أبو العريف إيلي مش بينضحك عليه وعاوزه حقه .. وعلى رأى أحد معارفي من بتوع الجيل القديم عندما قاللى مرة (( يا بنتي مفيش حد أهبل الايام دي )) .. بس تصدقوا احنا كلنا هبل وعبط .. متزعلش اوى كده ما أنا معاكم برده ، كلنا فى الهوا سوا .. منا زيك من مصر مش من هنولولو أو من جزر الهاوي .. وان كانت فى الحقيقة مش حتكلم عن مصر بس.. لا.. أنا حتكلم عن وضعنا كلنا كعرب فى الشرق الاوسط الصغير بتاعنا مش الكبير بتاع كونداليزاريس حمالة الحطب ..طيب احنا بقه هبل ليه ؟ اقولك يا عم ..مفيش حد اتبهدل اخر بهدلة فى العالم غيرنا كأمة اسلامية ولغاية دلوقت معرفناش ناخد حقنا ..الصهاينة اللى هما يعنى كام مليون ولا يساووا تلاته ساغ معفن عرفوا يخلوا الالمان يدفعوا دم قلبهم بسبب محرقة اليهود أو الهولوكوست ..

مع ان الالمان اللى دفعوا مش هما اللى حرقوا اليهود .. يعنى النظام النازي كله سقط ومع كده دفعوا الالمان غرامات مالية ناهيك بأه عن الابتزازات الاقتصادية وإجبار الالمان على اقامة مشروعات اقتصادية مع الصهاينة .. شغل يهود صحيح ! ، المهم اننا كأمة إسلامية تعرضنا لمصايب لا تقارنها أى مصايب تانية فى اى حتة فى العالم .. ومع كده مخدناش حقنا ..مين منكم يا جماعة سمع عن مأساة بربشتر ؟ ..بربشتر دى بلدة إسلامية كانت فىالاندلس ، والاندلس بأت بعد كده اسبانيا والبرتغال لما وقعت فى يد القشتاليين .. ايه ايلى حصل فى بربشتر؟ .. دخلت بربشتر القوات القشتالية بتواطىء من أحد حكام مدن الاندلس المسلم اللى اصلا استعان بيهم على اخوه المسلم التاني ، دخل القشتاليون بربشتر وقتلوا أربعة الاف مسلم فى يوم واحد .. مش كده وبس ده تم سبي 7ألاف فتاة بكر مسلمة وارسالهم هدايا لملوك أوروبا .. ده شرفنا يا جماعة ..أيام ما كان فيه نخوة ورجوله كان المتنبي بيقول (لا يسلم الشرف الرفيع من الأذى حتى يراق على جوانبه الدمُ ) ..دلوقتى احنا بنقول و أنا مالي !! ..لما سمعت القصة دى لاول مرة الدموع نزلت من عيني .. فين النخوة وفين الرجولة وأهل بابشتر بيستنجدوا بكل ملوك الاندلس ومحدش عاوز يسمع ومحدش عاوز يتكلم ..القصة دى فى تاريخنا.. لا هى من فيلم هابط من بتوع محمد سعد ولا هى مسلسل بايخ ممل .. دى قصة من تاريخنا مخلوطة بالدموع والدم .. طب وحنروح بعيد ليه نرجع للتمانينات عمل ايه الاتحاد السوفيتى المنحل مع المسلمين هناك ؟ ..عمل ايه الصرب مع البوسنة ؟ .. اغتصاب للمؤمنات المسلمات و قتل للرجال وتهدم للمساجد .. مين تحرك ؟ مين قال حرام ؟ مين قال نساعد ؟ .. مفيش ..

بربشتر بتتكرر وحتتكرر وبيحصل دلوقت فى العراق .. التاريخ بيعيد نفسه لكن للأسف محدش بيقرأ ومحدش عاوز يعرف ولو عارفنا مش بنتحرك أو بنعمل حاجه .. يا عم ياللى بتقول حقى ..يا عم ياللى بتتعارك فى الميكروباص على ربع جنيه وبتقول حقى .. حقك اهو دمك وعرضك مطالبتش بيه ليه ..اليهود طالبوا بحقهم من الالمان احنا بقه فين حقنا .. فين حقنا وحق عرضنا ودمائنا اللى سالت فى بلادنا بسبب الحرب الصليبية ..يا جماعة الغرب لغاية دلوقتي لم يعتذر عن الحروب الصليبية ..حتى الاعتذار بخلوا به علينا .. مش ده حقنا .. ولا الحق بس عندك الربع جنيه بتاع المكروباص اللى السواق عايز ياكله عليك .. أنا عاوزه احكيلكم كمان حكاية ..معلش بقه انا حعكنن عليكم شوية ..حد سمع عن (الموريسكيين ) ؟!.. دى برده مأساة حدثت فى الاندلس ..تاريخ الاندلس يا شباب مليان فوائد وعبر واحداث انا عاوزاكم بجد تقرأوا تاريخ الاندلس أو على الاقل تسمعوا سلسلة الاستاذ راغب السرجاني عن الاندلس .. الموريسكيين دى كلمة أسبانية معناها الاصاغر أو العرب المتنصرين .. لما سقطت الاندلس كلها فى يد الاسبان بسقوط غرناطة اخر القلاع الاسلامية حدث نوع غريب وشنيع من الاضطهاد الديني للمسلمين حتى وصل الامر إلى التنصير الاجباري للمسلمين لكل من بقى على ارض الاندلس وكانت أحكام الاعدام بالنار كثيرة ضد المسلمين، وكانت تنفّذ في مهرجانات عظيمة يتفرج فيها القساوسة، ورجال الدولة، والاهالي، وأحياناً الملك، وكبار رجال دولته، وكان بيتم حرق كل مسلم في مواكب الموت للترهيب، وأحياناً عائلات بأكملها، بأطفالها، ونسائها، دى عرفت فى التاريخ بإسم ( محاكم التفتيش ) ..كان القساوسة فى أسبانيا بمجرد الشك فى اى شخص انه مسلم يجيبوه ويسخلوه حيا وينشروه بالمناشير .. تعذيب مروع فعلا فاق تعذيب أبو لهب وابو جهل لعنهم الله للمسلمين ..

مأساة الموريسكيين مأساه مروعة لدرجة ان الاستاذ( محمد عبد الله عنان ) تكلم عنها فى حوالى 200صفحة فى كتاب اسماه ( نهاية الاندلس ومأساة العرب المتنصرين) .. الجريمة الكبرى دى مش مفروض نرفع قضية فى محكمة العدل الدولية ونطالب بحقنا ؟! .. ده حقنا المهضوم على مر التاريخ .. وهناك حوادث تاريخية كتيرة كلها أسي .. مش عاوزه اطول عليكم .. وكفاية كده عكننة .. وقبل ما اختم عاوزه اقول يلى بتدور على حقك فى ربع جنيه أو عشرة جنيه أو الف جنيه اتنصب عليكم فيهم ..حق ايه اللى انت جاى تقول عليه انت عارف أبلا معنى الحق ايه !!!!!

جميل والله

_________________

هههههههههه ماشى يا عم على الحق الجامد دة مشكور على الموضوع